مساء الخير يا دكتور
-مساء النور يفندم..
-عندي وجع في ظهري من تحت (Low Back Pain) بيروح وبييجي بقاله أيام
-أول مرة يحصلك ولا حصل قبل كده؟
-لا أول مرة يحصللي
-حضرتك بتشتغل إيه؟ وكام سنة؟ وقعت على ظهرك أو شلت حاجه تقيلة؟
-بشتغل (مثلاً: محاسب في بنك) وعندي (مثلاً 30 سنة) وموقعتش على ظهري ولا شلت حاجة تقيلة.. ده ظهر مرة واحدة
-طيب ...في أعراض مصاحبة للوجع ده زي ارتفاع في درجة حرارة الجسم أو كحة أو رجلك بتنمل باستمرار أو مش بتقدر تتحكم فى البول؟
لا برده يا دكتور ده وجع بس وبيروح وبييجي
-بيخف لما بتريح جسمك شوية؟
آه يا دكتور
-اكشف ظهرك هنفحصك ...
...إطمن ياصديقي ده مجرد شد عضلي
شد عضلي!!
-آه...الشد العضلي هو أول وأكتر سبب يعمل وجع للظهر
وده مش محتاج أشعة؟
-لا..
ممكن تقولي علاجه إيه يا دكتور وازاي أتفاداه وميحصليش تاني؟
-هناخد المسكن ده (.....) فترة مؤقتة وهنعمل تمارين إطالة وتقوية لعضلات الظهر وتقعد على المكتب وظهرك مفرود 90 درجة وكل ساعة أو ساعتين تقوم من على المكتب وتفك جسمك شوية ووقت النوم تنام على مرتبة ناشفة.
بس احنا في الحظر... مفيش مراكز علاج طبيعي.. هعمل التمارين ازاي؟!
-بسيطة هتدخل على اليوتيوب وتكتب تمارين لاطالة وتقوية عضلات الظهر وأعمل زيها يوم بعد يوم
شكرًا يا دكتور ... الاستشارة امتى؟
-بعد شهر تشرفني نطمن عليك أو لو ظهرت أي حاجة من الأعراض المصاحبة (قلناها فوق)تجيلي فورًا
------------------------------------------------------
#الخلاصة
■مش شرط تعمل أشعة فى أول زيارة ليك للدكتور
- طيب امتى تعمل/ي أشعة وتحاليل لو بتشتكي من ظهرك لأول مرة؟ ☆لو في حاجة من دول كانت مصاحبة لوجع الظهر لأول مرة:
1- حادث (مثلا: وقعت على ظهرك أو اتخبطت في ظهرك أو شلت حاجة تقيلة.....).
2- عدوى (سخونية ورعشة في الجسم أو حالات الإدمان عن طريق الحقن....).
3- تاريخ مرضي لورم فى الجسم.
4- تنميل في الرجل مستمر أو مش بتقدر تتحكم/ي في البول والإخراج.
5- لو أخدت العلاج وعملت التمارين لمدة شهر ومخفتش.
د. مصطفى محمود
جراح عظام
